UNDP YAWAZAWADIA WANAFUNZI 20 SH MILIONI 70 STUDENT FOUNDERS FELLOWSHIP

UNDP Tanzania Yawazawadia Wanafunzi Wajasiriamali 20 Zaidi ya Shilingi Milioni 70 Kupitia Awamu ya Pili ya Youth Ignite Student Founders Fellowship
Wanafunzi wajasiriamali ishirini kutoka vyuo vikuu mbalimbali nchini wamepatiwa zawadi za fedha taslimu zaidi ya Shilingi milioni 70 kufuatia shindano la uwasilishaji wa mawazo ya biashara lililoandaliwa chini ya mpango wa Youth Ignite Student Founders Fellowship – Awamu ya Pili. Mpango huo unatekelezwa kupitia Programu ya FUNGUO iliyo chini ya Shirika la Umoja wa Mataifa la Mpango wa Maendeleo (UNDP) nchini Tanzania, kwa ufadhili wa pamoja wa Serikali ya Uingereza kupitia Ofisi ya Mambo ya Nje, Jumuiya ya Madola na Maendeleo (FCDO), Umoja wa Ulaya (EU) na Serikali ya Finland.
Shindano hilo liliwakutanisha wanafunzi 30 kutoka taasisi mbalimbali za elimu ya juu nchini, waliowasilisha mawazo bunifu ya biashara yenye mchango chanya kwa jamii mbele ya jopo la majaji. Tukio hilo limeelezwa kuwa hatua muhimu katika kuimarisha ujasiriamali na ubunifu miongoni mwa vijana wa Kitanzania. Mbali na kupokea zawadi za fedha taslimu, wanafunzi wajasiriamali walipatiwa pia msaada wa kitaalamu, ikiwemo mafunzo ya maendeleo ya biashara, ushauri elekezi (mentorship), pamoja na maandalizi ya kuwafanya wawe tayari kuvutia wawekezaji wapya.
Akizungumza na Habari Leo, Dkt. Harun Makandi, Mkurugenzi Msaidizi wa Sayansi na Teknolojia kutoka Wizara ya Elimu, Sayansi na Teknolojia, alisema mpango huo unaendana kikamilifu na ajenda ya Serikali ya kukuza ubunifu, utafiti wenye tija kibiashara na ujasiriamali miongoni mwa vijana. “Mpango huu unaunga mkono moja kwa moja jitihada za serikali za kulea kizazi kipya cha wabunifu na wazalishaji wa ajira mpya kinachotoka katika taasisi zetu za elimu ya juu. Unaakisi mwelekeo wa Tanzania wa kuunganisha sayansi, teknolojia na ujasiriamali katika maendeleo ya taifa,” alisema Dkt. Makandi.
Kwa upande wake, John Rutere, Naibu Mwakilishi Mkazi wa UNDP Tanzania, alisema ushirikiano huo unachangia kwa kiasi kikubwa kufikia malengo ya muda mrefu ya maendeleo ya nchi. “Jukumu la UNDP nchini Tanzania limejikita katika kuunga mkono Dira ya Maendeleo ya Tanzania 2050 (DIRA 2050), inayolenga kuifanya Tanzania kuwa nchi ya kipato cha kati cha juu kwa kufikia uchumi wenye thamani ya Dola za Kimarekani trilioni moja ifikapo mwaka 2050. Kufikia dira hii kunahitaji uwekezaji wa makusudi kwa vijana na biashara zao,” alisema Rutere. Aliongeza kuwa programu kama Youth Ignite Student Founders Fellowship ni mifano halisi ya miradi inayowawezesha vijana kwa ujuzi, mitandao ya wawekezaji na mitaji inayohitajika kujenga biashara zenye uwezo wa kukua na kuchangia kikamilifu katika uchumi wa taifa.
Washirika wa maendeleo walichangia kwa kiasi kikubwa kufanikisha kundi hili la washiriki. Euan Davidson, Kiongozi wa Timu ya Miradi Endelevu kutoka FCDO, alisisitiza umuhimu wa kuwekeza katika biashara zinazoongozwa na vijana kama kichocheo cha ukuaji wa uchumi jumuishi. Kwa upande wao, Westerwelle Foundation Tanzania na StartHub Africa walitoa mafunzo ya vitendo ya ujasiriamali, ikiwemo maandalizi ya uwasilishaji wa mawazo ya biashara (pitch development), ili kuhakikisha washiriki wanakuwa tayari kuvutia wawekezaji kabla ya mashindano. Naye Sanna-Liisa Taivalmaa, Mkuu wa Ushirikiano katika Ubalozi wa Finland, alithibitisha dhamira ya Finland kuendelea kuunga mkono mifumo ya ubunifu na ujasiriamali wa vijana kama sehemu ya vipaumbele vya ushirikiano wa maendeleo. Miongoni mwa washindi waliofanya vizuri zaidi, kila mmoja alipokea Shilingi milioni 6 kwa ajili ya kukuza biashara zao. Mmoja wao ni Herriet Nairumbe, Mwanzilishi wa Niches Food Products yenye makao yake Arusha, inayojihusisha na uongezaji thamani wa mazao ya pilipili na matunda.
Akizungumza baada ya kutangazwa mshindi, Herriet alisema fedha hizo zitasaidia kuongeza uzalishaji na kupanua masoko. “Fedha hizi zitatumika kununua mashine itakayorahisisha uzalishaji na kuongeza tija. Pia tunapanga kuwekeza katika masoko ya mikoa mingine ili bidhaa zetu ziwafikie watu wengi zaidi,” alisema. Aliongeza kuwa kupitia programu hiyo wamejifunza utunzaji wa kumbukumbu za kifedha, upangaji wa bei, ujenzi wa timu na huduma kwa wateja, hatua zinazosaidia biashara yao kukua na kutoa ajira kwa vijana wengine.
Mshindi mwingine ni Irene George Ngatibigwa, Mwanzilishi Mwenza wa Eco Mushroom, kampuni inayojihusisha na uzalishaji wa uyoga mbichi, uliokaushwa, unga wa uyoga na vitafunwa vinavyotokana na uyoga. Irene alisema changamoto ya awali ilikuwa ni ukosefu wa miundombinu ya kupanua uzalishaji na kufikia masoko makubwa. “Nilikuwa napata oda lakini sikuweza kuingia mikataba kwa sababu sikuwa na uwezo wa kukidhi mahitaji ya usambazaji,” alisema.
Alieleza kuwa Shilingi milioni 6 alizopata zitamsaidia kununua vifaa, kuboresha miundombinu ya uzalishaji na kuajiri vijana zaidi katika uzalishaji na masoko. Baada ya kushiriki programu hiyo, Irene alisema mtazamo wake wa kibiashara umebadilika kwa kiasi kikubwa. “Kabla ya kujiunga na programu hii nilikuwa nafanya biashara kwa mapenzi binafsi bila ujuzi rasmi wa masoko au uwasilishaji kwa wawekezaji. Kupitia mafunzo, nimejifunza masoko, uwasilishaji na kujenga mitandao ya wawekezaji. Ujuzi huu utakuwa muhimu sana tunapopanua biashara yetu,” alisema. Kwa ujumla, Youth Ignite Student Founders Fellowship inaendelea kujenga kizazi cha biashara za wanafunzi zenye uwezo mkubwa wa kukua, kuunda ajira na kuchangia mabadiliko chanya ya kiuchumi nchini Tanzania. Washindi wanawakilisha sekta mbalimbali ikiwemo teknolojia, kilimo-biashara, suluhisho za mabadiliko ya tabianchi, uzalishaji viwandani na ubunifu wa kijamii.

Comments

Post a Comment

Popular posts from this blog

MATAIFA 8 KUIMBA TAMASHA LA PASAKA

Image
Kuelekea Tamasha la Pasaka mwaka 2024 Alex Msama Mkurugenzi wa kampuni ya Msama Promotion mwaandaaji wa Tamasha hilo amethibitisha waimbaji wa muziki wa injili kutoka mataifa  zaidi ya 8 watakuwepo kwenye Tamasha la Pasaka la mwaka huu. Akizungumza na waandishi wa habari Alex Msama kuwa maandalizi makubwa kuelekea Tamasha hilo yamekwisha fanyika kwa asilimia kubwa na watu wakae mkao wa kula kwani Tamasha la mwaka huu litakuwa na zuri na lenye shangwe kubwa sana kwa wakazi wa mkoa wa Dar es salaam. Tamasha la mwaka huu litafanyika siku ya Jumapili ya Pasaka, huku kauli mbiu ikiwa ni ASANTE MUNGU KWA KUTUPA RAIS SAMIA S HASSAN MCHAPA KAZI
Read more

PIMEA USIKU WA WANA NDOA ULIVYOFANA MSIFICHANE NA KUWEKEANA VITU

Image
‎Wanandoa watashauriwa kuwa na mitoko ya pamoja kujua mwenzio anapenda kula nini kuvaa na kunywa ili kuendelea kudumisha ndoa yao, Ndoa bora ni ushirikiano, siyo mashindano. ‎Akizungumza mwaandaaji wa Usiku huo wa wanandoa The Pinnacle of Mentorship & Excellence Award (PIMEA) Dkt Christine Mbelwa amesema Lengo la Usiku wa Wanandoa nikuwakutanisha na kubadilishana mawazo kuhusiana na kukumbusha baadhi ya mambo ya ndoa. ‎"Moja ya majukumu ambayo Mungu amenikabidhi mimi pamoja na mume wangu ni kujenga ndoa na mahusiano imara kupitia uandishi wa vitabu, semina, makongamano na mafundisho mbalimbali. ‎"Usiku wa Wanandoa ni moja ya jukwaa kuu tunalotumia kwa lengo la kuboresha, kuponya na kuokoa ndoa. Tunawakusanya wanandoa pamoja, kuwapa mafundisho ya vitendo ana kwa ana, kuruhusu maswali na kutoa majibu ya moja kwa moja. ‎ ‎Amesema Zaidi ya mafundisho, wanandoa hupata nafasi ya kufurahi pamoja kwa kushiriki vinywaji, michezo na burudani mbalimbali. Shughuli hi...
Read more

UONGOZI DHAIFU VYATAJWA KUVURUGA TAASISI ZA VIJANA

Image
"Ukosefu wa Fedha, Uongozi Dhaifu Vyatajwa Kuvuruga Uhai wa Taasisi za Vijana" Dar es Salaam. Ukosefu wa fedha, masharti magumu kutoka kwa wafadhili, kutokuwa na maarifa ya kutosha ya uendeshaji wa taasisi na rasilimali zake ni miongoni mwa changamoto zinazochangia taasisi nyingi zinazoanzishwa na vijana kufa kabla ya kufikia malengo yake. Hayo yameelezwa na Mkurugenzi Mtendaji wa taasisi ya Her Initiative, Lydia Charles, katika hafla ya kuhitimisha mafunzo ya uongozi kwa taasisi 20 zinazoongozwa na vijana kupitia programu ya Adaptive Leadership Program chini ya mradi wa Ustawi Lab. Amesema changamoto hizo zimekuwa kikwazo kikubwa kwa vijana wanaotamani kuleta mabadiliko chanya katika jamii kupitia taasisi zao, jambo lililowasukuma kuanzisha mafunzo hayo ya uongozi ili kuwajengea uwezo wa kimfumo na kimkakati. "Tuliona kuna haja ya kuimarisha uwezo wa viongozi vijana kwa kuwapatia mbinu za kukabiliana na changamoto mbalimbali, kuboresha mifumo ya taasisi zao...
Read more